A bugia rà verità di Escluso Mortimer

Stanotte nun putevu rorme e m’aggiu missu a pensà si pe campà n’coppa a stu Munnu era meglio a bugia o a verità!
E mentre cu me stessu parlavu me ricevu che n’fondu rint a ogni bugia c’è stà nu pocu e verità, ma si è accussi puru rint a ogni verità ci stà nu pocu e bugia.
Ma forse a bugia nun esiste magari esiste sulu a verità vera e a verità fausa, ma si forse è accussi, ma si accussi tuttu stu discorsu l’aggia cagnà.-
E assì lu cagnui allora aggia ricere che rint a ogni verità ci stà nu fundu e falsa verità, e chestu è logicu vistu che a bugia nun esiste o no?
A vera verità e a fausa verità, me piace sta cosa, ma aspetta nu pocu, e si u veru fosse nata cosa, e si esistesse a bugia vera e chella fausa?
Marò ma pecchè a chest’ora me vengunu sti pensieri?
E mò u dubbio è forte, allora esiste a verita vera e chella fausa, o esiste a bugia vera e fausa, o esistunu tutte e doie, o meglio quattro comm me pare che stoncu a ragionà, si po’ stoncu a ragiunà, e puru cà se aessa verè se fosse bugia o verità!
Si stoncu a ragiunà bonu o malamente, quasi fosse nu miscredente, mah e chi lu po sapè, forse mancu iu.-
E mentre stoncu a fa tuttu stu bellu ragionamentu se so fatte quasi e tre rà notte, e eccu che se sente a rint a stanza alluccà muglierema che rice ma ancora locu stai, te vuo veni a cuccà?
Amò stoncu a veni gli risponnu, mentre chiurru a telefonata cu a femmina che stava cu me a ragiunà n’coppa a bugia e a verità.-
Me vacu a cuccà, a muglierema ci ricu, nun me sentivu troppu bonu, so sciutu foru u balcone a piglià nu pocu r’aria, e rint a me m’addimmannu ma mò gli aggiu rittu na vera bugia o na falsa verità?
Ai posteri l’ardua sentenza, a saperlu chi so sti posteri mò, pè mò meglio che astutu a luce e m’addormu, buonanotte!